ဝါဆိုလပြည့် ကျားမင်းနေ့

မနက်ဖြန် ၂၀၁၀ ခုနှစ် ၊ ဇူလိုင်လ ၊ ၂၆ ရက် ( တနင်္လာနေ့ )၊ မြန်မာသက္ကရာဇ် ၁၃၇၂ ခုနှစ် ၊ ဒုတိယ၀ါဆိုလပြည့်နေ့ ဟာ ဗုဒ္ဓဘာသာဝင်များအတွက် အထွဋ်အမြတ်နေ့ထူးတစ်နေ့ ဖြစ်ပါတယ် ။
၁ ။ နတ်ဗြဟ္မာတို့ရဲ့ တောင်းပန်မှုကြောင့် အလောင်းတော်သေတကေတုနတ်သားဟာ နတ်အဖြစ်မှ စုတေတော်မူကာ ကပိလ၀တ်ပြည့်ရှင် သုဒ္ဓေါဒနမင်းမြတ်၏ အဂ္ဂမဟေသီတောင်ညာစံဒေ၀ီဖြစ်တော်မူသော မယ်တော်မာယာရဲ့ဝမ်းကြာတိုက်တွင် ပဋိသန္ဓေယူတော်မူ သောနေ့ဖြစ်ဖြစ်ပါတယ် ။
၂ ။ သက်တော် ၁၆ နှစ်မှ စတင်ကာ ကပိလ၀တ်ထီးနန်းစည်းစိမ်ကို ၁၃ နှစ်ကြာ စံစားပျော်ပါး၍ သက်တော် ၂၉နှစ် အရွယ်တွင် နတ်ဗြဟ္မာတို့၏ ဖန်ဆင်းမှုဖြင့် သူအို ၊ သူနာ ၊ သူသေ ၊ ရဟန်း ဆိုတဲ့ နိမိတ်ကြီးလေးပါး မြင်တော်မူပြီးနောက် တောထွက်တော်မူသောနေ့လည်း ဖြစ်ပါတယ် ။
၃ ။ ဘုရားဖြစ်တော်မူပြီးနောက် မိဂဒါဝုန်တောတွင် ကောဏ္ဍညအမှူးပြုတဲ့ ပဉ္စ၀ဂ္ဂီငါးဦးအား တရားဦးဟောတော်မူသော နေ့ထူးနေ့မြတ် လည်းဖြစ်ပါတယ် ။
မနက်ဖြန်ကျရောက်တော်မူသော ၀ါဆိုလပြည့်နေ့သည် ဗုဒ္ဓဘာသာမြန်မာလူမျိုးများ၏ အယူအရ တနင်္လာနေ့ဖြစ်သည်နှင့်အညီ ဘုရားအလောင်းတော် သိဒ္ဓတ္ထမင်းသား တောထွက်တော်မူသောနေ့အဖြစ် မှတ်ယူနိုင်ပါတယ် ။ ကျေးဇူးရှင် လယ်တီဆရာတော် ဘုရားကြီးက ခုနှစ်နေ့ဘုရားရှိခိုးတွင် -
- ဖွားမြင်မြောက်သော် ၊ ဆယ့်ခြောက်နှစ်ရွယ် ၊ ပျိုနုနယ်၌ ၊ သုံးသွယ်ရွှေနန်း ၊ သိမ်းမြန်းပြီးလစ် ၊ ဆယ့်သုံးနှစ်လျှင် ၊ ဘုန်းသစ်လျှံလူ ၊ စံတော်မူ၍ ၊ ရွယ်မူနုဖြိုး ၊ နှစ်ဆယ့်ကိုးဝယ် ၊ လေးမျိုးနိမိတ် ၊ နတ်ပြဟိတ်ကြောင့် ၊ ရွှေစိတ်ညင်ညို ၊ သံဝေပိုက ၊ ၀ါဆိုလပြည့် ၊ ကျားမင်းနေ့ဝယ် ၊ ချမ်းမြေ့ရဂုံ ၊ တောရပ်လှုံသည် ၊ စုံမြိုင်ပင်ရိပ် ၊ ခန်းမှာကိုး ။ ။
ဟု ရေးစပ်သီကုံးတော် မူခဲ့ပါတယ် ။
ဗုဒ္ဓဘာသာဝင်များက ၀ါဆိုဝါကပ်တော်မူမည့် ရဟန်းသံဃာတော် အရှင်သူမြတ်များအား ရည်မျှော်မှန်း၍ ၀ါဆိုသင်္ကန်းတော်များ ဆက်ကပ်လှူဒါန်းတော်မူကြသည့် အချိန်ခါသမယ နေ့ထူးနေ့မြတ်ဖြစ်သည်နှင့်အညီ မုဒိတာတရားစိတ်ဝယ်ထားကာ သာဓု အနု မောဒနာ ခေါ်ဆိုထိုက်လှပါပေတယ် ။
မိတ်ဆွေအပေါင်းတို့ သိပြီးဖြစ်ပေမယ့် ဒီပို့စ်လေးကိုဖတ်မိတဲ့အခိုက် မြတ်စွာဘုရားရှင်ကိုယ်တော်မြတ်အား ပူဇော်ဦးခိုက်နိုင်ပါရန် ကျေးဇူးရှင် လယ်တီဆရာတော် ဘုရားကြီး၏ ဗုဒ္ဓနေ့ ခုနှစ်နေ့ဘုရားရှိခိုးအား ရေးသားဖေါ်ပြလိုက်ရပါတယ် ။
၁ ။ သုံးလူ့ရှင်ပင် ၊ ကျွန်းထိပ်တင် ၊ သောင်းခွင်စကြာဝဠာ ၊ နတ်ဗြဟ္မာတို့ ၊ ညီညာရုံးစု ၊ တောင်းပန်မှုကြောင့် ၊ ရတုနဂိုရ် ၊ ရွှန်းရွှန်းစိုသည် ၊ ၀ါဆိုလပြည့် ၊ ကြွက်မင်းနေ့ဝယ် ၊ ချမ်းမြေ့ကြည်ဖြူ ၊ သန္ဓေယူသည် ၊ နတ်လူငြိမ်းဖို့ ၊ ကိန်းပါကိုး ။ ။
၂ ။ သန္ဓေယူကာ ၊ ဆယ်လကြာသော် ၊ မဟာသက္ကရာဇ် ၊ ခြောက်ဆယ့်ရှစ်ကြုံ ၊ ကဆုန်လပြည့် ၊ သောကြာနေ့ဝယ် ၊ ချမ်းမြေ့စုံစီ ၊ လုံဗနီ၌ ၊ မဟီလှိုက်ဆူ ၊ ဖွားတော်မူသည် ၊ နတ်လူအောင်မြို့ ၊ လမ်းပါကို ။ ။
၃ ။ ဖွားမြင်မြောက်သော် ၊ ဆယ့်ခြောက်နှစ်ရွယ် ၊ ပျိုနုနယ်၌ ၊ သုံးသွယ်ရွှေနန်း ၊ သိမ်းမြန်းပြီးလစ် ၊ ဆယ့်သုံးနှစ်လျှင် ၊ ဘုန်းသစ်လျှံလူ ၊ စံတော်မူ၍ ၊ ရွယ်မူနုဖြိုး ၊ နှစ်ဆယ့်ကိုးဝယ် ၊ လေးမျိုးနိမိတ် ၊ နတ်ပြဟိတ်ကြောင့် ၊ ရွှေစိတ်ညင်ညို ၊ သံဝေပိုက ၊ ၀ါဆိုလပြည့် ၊ ကျားမင်းနေ့ဝယ် ၊ ချမ်းမြေ့ရဂုံ ၊ တောရပ်လှုံသည် ၊ စုံမြိုင်ပင်ရိပ် ၊ ခန်းမှာကို ။ ။
၎ ။ တောရပ်မြိုင်ပေါ် ၊ ခြောက်နှစ်ပျော်၍ ၊ ခါတော်တစ်ဖုံ ၊ ပွင့်ချိန်ကြုံက ၊ ကဆုန်လပြည့် ၊ ဆင်မင်းနေ့ဝယ် ၊ မြေ့ပရမေ ၊ ပလ္လင်ဗွေထက် ၊ ရွှေညောင်တော်ကြီး ၊ ဗိတာန်ထီးနှင့် ၊ မငြီးကြည်ဖြူ ၊ နေတော်မူလျက် ၊ ရန်မြူခပင်း ၊ အမိုက်သင်းကို ၊ အလျဉ်းပယ်ဖျောက် ၊ အလင်းပေါက်က ၊ ထွန်းတောက်ဘုန်းတော် ၊ သောင်းလုံးကျော်သည် ၊ သုံးဖေါ်လူတို့ ၊ ငြမ်းပါကို ။ ။
၅ ။ ဘုရားဖြစ်ခါ ၊ မိဂဒါသို့ ၊ စကြာရွှေဖွား ၊ ဖြန့်ချိသွား၍ ၊ ငါးပါးဝဂ္ဂီ ၊ စုံအညီနှင့် ၊ မဟီတစ်သောင်း ၊ တိုက်အပေါင်းမှ ၊ ခညောင်းကပ်လာ ၊ နတ်ဗြဟ္မာအား ၊ ၀ါဆိုလပြည့် ၊ စနေနေ့ဝယ် ၊ ကြွေ့ကြွေ့လျှံတက် ၊ ဓမ္မစက်ကို ၊ မိန့်မြွက်ထွေပြား ၊ ဟောဖေါ်ကြားသည် ၊ တရားနတ်စည် ၊ ရွမ်းတယ်ကို ။ ။
၆ ။ တရားနတ်စည် ၊ ဆော်ရွမ်းလည်က ၊ သုံးမည်ဘုံထိုက် ၊ တစ်သောင်းတိုက်ဝယ် ၊ ကျွတ်ထိုက်သသူ ၊ နတ်လူဗြဟ္မာ ၊ သတ္တ၀ါကို ၊ ခေမာသောင်သို့ ၊ ဖေါင်ကူးတို့ဖြင့် ၊ ဆောင်ပို့ပြီးခါ ၊ ၀ါလေးဆယ့်ငါး ၊ သက်ကားရှစ်ဆယ် ၊ စုံပြည့်ကြွယ်က ၊ ရာလေးဆယ့်ရှစ် ၊ သက္ကရာဇ်ဝယ် ၊ နယ်မလ္လာတိုင်း ၊ စံနှိုင်းမယုတ် ၊ ကုသိနာရုံ ၊ အင်ကြင်းစုံ၌ ၊ ကဆုန်လပြည့် ၊ အင်္ဂါနေ့ဝယ် ၊ ချမ်းမြေ့နိဗ္ဗူ ၊ စံတော်မူသည် ၊ ၀ှန်းဆူသောင်းလုံး ၊ ကျော်တယ်ကို ။ ။
၇ ။ နိဗ္ဗူစံပြီ ၊ ရှုမအီသာ ၊ သိဂီ င်္ရွှေလှော် ၊ အလောင်းတော်ကို ၊ ထိုရော်ကဆုန် ၊ လဆုတ်ကြုံ၍ ၊ ဂဠုံနေ့ဝယ် ၊ ခိုးငွေ့မနော ၊ ဓါတ်တေဇောလျှင် ၊ ရှင်စောညဏ်စက် ၊ ဓိဋ္ဌာန်ချက်ဖြင့် ၊ လျှံတက်ကော်ရော် ၊ မီးပူဇော်သည် ၊ မွေတော်ရှစ်စိတ် ၊ ကြွင်းတယ်ကို ။ ။
၈ ။ ထိုခုနှစ်နေ့ ၊ သာချမ်းမြေ့ကို ၊ စွေ့စွေ့ကြည်ဖြူ ၊ အာရုံယူလျက် ၊ သုံးလူတို့နတ် ၊ မြတ်ထက်မြတ်ဖျား ၊ ကိုယ်တော်ဘုရားကို ၊ သုံးပါးမှန်စွာ ၊ ၀န္ဒာဖြင့် ၊ သဒ္ဒါဖြိုးဖြိုး ၊ ကျွန်ရှစ်ခိုးသည် ၊ ကောင်းကျိုးခတ်သိမ်း ၊ ကြွယ်စေသောဝ် ။ ။
အောက်တွင်ပေးထားသော link သည် Burmeseclassic.com ဗုဒ္ဓ၀င်များမှ တောထွက်တော်မူခန်းဖြစ်ပါသည် ။
http://www.burmeseclassic.com/show2.php?id=&s=&tc=&FMfile=Buddhawin4.xml
အောက်ပါ video သည် ကဆုန်လပြည့်နေ့ကို အထူးပြုဟောကြားထားသော်လည်း ၀ါဆိုလပြည့်နေ့နှင့်သက်ဆိုင်သည်များကို လည်း နာယူပူဇော်နိုင်ပါသဖြင့် မျှဝေလိုက်ပါသည် ။

မှတ်ချက် ။ ။ တစ်စုံတစ်ရာ အမှားအယွင်းများပါခဲ့လျှင် ရေးသားသူ မိမိ၏ အမှားများသာဖြစ်ပါသည် ။